港產新片出DVD嘅時間，好似愈嚟愈短速，以往好多時都要三幾個月，不過今個星期呢套《魂魄唔齊》，剛落畫個零月，又話要出碟！承接戲院上映嘅餘威，以及大家對該片新鮮嘅記憶，聽聞旺角、深水埗銷情都相當凌厲，唔少舖頭都有斷貨情形出現，講真遲一個月只需要用45蚊，可以一家大細開開心心喺屋企睇，真係幾抵！
記者、攝影：朱崇德
《魂魄唔齊》係一套集浪漫、搞笑、驚嚇、感人於一身嘅電影，故事講述戲班二打六路初八（陳奕迅飾），成日撞見紅燈籠（傳說紅燈籠是戲班老行尊的鬼魂化身），後來發現她原來是30年代當紅反串的文武生紫雲飛（容祖兒飾）；由於紫對爛賭二蔣浩風（謝霆鋒飾）嘅感情始終未了，再加上首次破戒以花旦行當演出樓臺會時，不幸被墮下的花牌削去半邊面而魂斷戲台上。紫要以自己一半魂魄投胎轉世的路初八，為她完成心願，從而引發連場笑料。
以時下流行歌手，大唱粵曲化「行」妝演粵戲，感覺的確幾新鮮，唔講大家可能唔知，原來導演梁柏堅，對戲班有一段不解的情意結（開拍此片已可見），為咗認真製作，特別情商粵劇界老行尊女姐及文千歲，分別作容祖兒及陳奕迅的粵劇指導，所以各項粵劇功架演出，都特別傳神，再加陳及容的生鬼演繹，絕對是對粵劇這項國粹敬禮之作。
以拍《絕世好Bra》搞笑聞名嘅梁柏堅，再加上賤精先生陳奕迅，你話又點可以唔引發大量笑料，戲中有幾段特別搞鬼，好似伍詠薇同黃秋生喺劇院內偷情時，被陳及一眾人撞破好事，黃為掩飾而訛稱「俾鬼姦」！另一段講容祖兒上陳奕迅身後，誤認書童為蔣浩風，一老一少大床上勁玩搞基笑料，都非常搞鬼。