前晚「星雲大師佛學講座2002」喺紅館舉行，鄺美雲、鄭佩佩同皈依兩年嘅郭富城都有出席。而城城重上台唱由星雲大師填詞嘅《祈求》，不過身為天王級嘅城城，唱到尾段竟然甩嘴。佢之後同大師講話自己心有雜念，重要求重唱，佢用國語話：「之前我錄一首歌，平常只錄兩至三小時，但是我唱這歌時永不在狀態，而且心有雜念，對我來說歌詞好複雜，大師為甚麼呢？」
星雲大師安慰城城話：「不怕妄念起，只怕覺照遲。」星雲重話下次嚟香港，都要城城唱歌。
《祈求》其中有句歌詞「憶往事，罪孽心重，怎不悲傷」，記者問城城係咪因為有唔開心嘅往事，所以有雜念，佢話：「基本上我有雜念，通常係為工作。唱嘅時候思緒混亂，可能我修為尚淺啦！加上重喺大師（星雲大師）面前唱，有壓力！」
另外，鄺美雲近排專心聽佛經，對於老友梁家輝醉酒，佢話：「睇報紙，知佢有悔意，佢講得啱，經一事長一智。」問佢會唔會對謝霆鋒講佛，鄺美雲就話：「隨緣啦！見到或者會傾。」
陳妙瑛噚日喺銅鑼灣出席剪綵活動，重戴咗隻三卡鑽戒，佢話因為生意上賺到少少，當獎勵自己。提到有雜誌影到佢同蔡志明一齊喺鬧市出現，重以女主人身份去形容佢，佢就話：「好無謂，真係無嘢好講，所以毋須解釋，少少嘅誇大同渲染我冇能力控制，𠵱家我只會畀心機做嘢！」
早前蔡國權喺東莞遇上交通意外，喺內地醫院留醫。雖然蔡國權到𠵱家都未甦醒，但佢屋企人見蔡國權情況穩定，於是將佢送返香港威爾斯親王醫院治理。噚日環球唱片有人到醫院探過蔡國權，知道佢情況都穩定，而蔡國權屋企人希望幫佢轉去私家病房，等佢住都住得舒服啲！
巨星一直好崇洋，永遠覺得外國月亮特別圓，表面上就扮到好仁義，份人又小器，只係鍾意啲傳媒對佢歌功頌德，私底下就成日搵佢好友幫佢搵妹妹仔。
馮仁昭聽一個姐仔講，話呢位巨星好孤寒，每次想叫佢送禮物，佢頂多會送啲贊助商送嘅嘢，搞到個女仔好冇癮，後尾重主動飛佢。
古天樂同鄭秀文（Sammi）噚日出發去成都拍新片《百年好合》，今次佢大概會去一個禮拜。古仔有fans專程去送機，重買咗暖水袋同護膚品畀佢。而古仔就話準備咗天蠶衣同埋暖包去成都。Sammi冇化妝，佢一見到記者就衝入閘，避開鏡頭。
黎瑞恩同金利來太子爺曾智明拍拖六年以嚟，成日都傳出婚訊。直至今個月十八號，阿恩終於同曾智明結得成婚，馮仁昭都戥佢高興。不過，噚日馮仁昭同佢助手傾偈，先知阿恩原來重未影婚紗相，因為準新郎曾智明呢排工作好鬼忙，阿恩要同佢慢慢度期先至搞得掂。