吳鎮宇與王麗萍明天在泰國共諧連理，前晚一對準新人提前往曼谷為婚宴試菜。昨日鎮宇一早到泳池游水，操弗身形，以便明天以最佳狀態舉行低調而隆重的婚禮，他更表示婚後要盡快「造人」。
吳鎮宇明天與新加坡電視台前藝員王麗萍在泰國曼谷舉行婚禮，一對準新人於素可泰酒店（SukhothaiBangkokHotel）設婚宴。為了在婚禮當日能以最佳狀態示人，昨日早上九時鎮宇穿了Speedo泳褲到酒店內的泳池游水，而他的未婚妻則未有同行。
心情極佳的鎮宇經常笑容滿臉，他游了約一個小時後，始坐在池邊曬太陽，他說：「Fiona（王麗萍）未瞓醒，所以我咪自己落嚟游水囉！雖然禮拜一（明日）就行禮，但心情冇乜特別，因為之前都註咗冊，連戒指都交換埋，所以行禮嗰日唔會再有交換戒指儀式。臨嚟泰國前，我見到張達明九個月大嘅BB，真係好可愛，所以我想婚後盡快生BB。」
明天鎮宇將穿一套特別訂做約值萬多元的珍珠紅色西裝，而新娘王麗萍則會穿約值三萬元、水晶和珍珠製成的古董晚禮服，鎮宇說：「Fiona除咗呢套古董珍珠裙外，重會着另一套白色晚禮服，兩套衫加埋成幾萬蚊。」
鎮宇又說：「行完禮之後，就會喺酒店擺五圍泰國菜，到時有魚、蝦、蟹、雞、豬頸肉，連炸香蕉都有，招呼約五十幾位親朋好友，除男女家親友外，聽日張達明、劉青雲兩對夫婦、子華同女友都會過嚟飲。
「我一向係獨孤村，所以今次請嚟泰國飲嘅朋友唔多，但婚訊見報後，諗唔到會有好多圈中人嬲我冇請佢哋，所以我哋返香港之後，會補請朋友食飯。」
記者何永寧、黃文成泰國直擊