周日派對拿手小食　靠醬汁搞掂

虔誠基督徒Christine，最愛鑽研煮食心得，亦愛將美食公諸同好，深得一班教友歡迎，每月總有一、兩個星期天聚首談天，大吃大喝。上周日一班教友有大有細，十幾人浩浩蕩蕩走到她家中開派對，身為主人家當然不敢怠慢，以拿手好戲滷水鵝掌鵝翼，以及初試啼聲的印尼沙嗲串燒嚴陣以待。兩款小食成功關鍵同樣在醬汁，令平平無奇的食物變得滋味無窮。

記者：周麗懿　攝影：黃子偉

印尼沙嗲串燒
Christine家中的工人Annie是印尼人，有一次嘗試煮家鄉菜給她品嘗，誰知Christine一試便讚不絕口，還嚷着要跟工人學做。原來製作沙嗲汁的沙嗲糕，是印尼菜的百搭材料，除可作串燒的醬料之外，配合其他食物亦相當滋味。而印尼甜豉油亦用途多多，好多印尼人都喜歡用甜豉油撈麵食。在工人指導下，Christine處女下海弄沙嗲串燒，結果相當成功呢！要買齊各式印尼材料或滷水料，都可在印尼雜貨店搵到。

材料（約40條）：
雞髀肉7隻、牛肉10両、印尼沙嗲糕2件、印尼甜豉油適量、炸乾葱片1包、紅辣椒適量

醃料：
鹽、油、糖、豉油、豆粉、胡椒粉各適量

試味報告：
以前以為沙嗲汁要用鑊煮熟，想不到製作如此簡單，且風味十足，食完一串又一串！

潮州滷水鵝掌鵝翼
這味潮州滷水食物是師承Christine的表姊，「我表姊用口頭教我，跟住我自己鑽研，份量都係自己試番嚟。除汁料重要外，掌握焗嘅技巧都好緊要，煮唔同食物都有唔同焗法，鵝掌鵝翼焗一次就得，如焗得唔夠或過耐，就會唔好食。」Christine重教路，每包滷水料可重複使用約3次，只要將用完的滷水料洗淨，用保鮮袋包好，放入雪櫃存放，下次用之前再洗淨便可！

材料：
滷水料1包、鵝翼鵝掌6磅、薑1件、蒜頭8粒、葱段少許

調味料：
生抽2飯碗、老抽21/2飯碗、紹興酒半碗、冰糖2件、雞粉2湯匙、粗鹽1湯匙

試味報告：
鵝翼十分入味，皮和肉都滲透着滷水的香氣，相信焗的時間令鵝掌鵝翼吸收了滷水的精華所致。

揀鵝掌翼小秘訣
Christine話不大喜歡買冰鮮鵝掌鵝翼，只會買新鮮的。揀鵝翼最重要是無毛，軟身有彈性，夠肥夠大隻，身上又沒有瘀黑，便屬正貨。鵝掌就揀一些無繭的，因為有繭表示那些鵝行路行得多，影響肉質。