公關大姐大與朋友去上海，佢就入城公幹，朋友就到上海近郊周莊遊覽。左丁山未去過周莊，據講該地風景雅致，甚有古風，唔少遊客到上海，都會抽出一日半日到周莊一行。
大姐大嘅朋友回報，此行大失所望。原因有三，嚴重性各有不同。第一，當地以前有條清水河，兩岸吸引外客；但到實地一睇，河水經已變黑，兼且發臭，差過沙田城門河，去唔去都罷。
第二，周莊有著名土產「萬三蹄」，乃清代富豪沈萬三所創製嘅豬手，聞名遠近，朋友去到周莊，自然要買一隻返嚟；但見到市場上豬手處處，暴露於陽光之下，映照蒼蠅飛舞，朋友睇見都反胃。後來去到一間店舖，稍為乾淨，買咗一隻返嚟，當晚就想試食，點知一打開包紮紙，豬蹄已經發臭，急忙丟棄之。
第三，當地亦有名茶「碧螺春」發售，價錢比上海便宜一半，朋友當然買番一罐。拎到返香港，唔捨得飲住，直至邀請咗幾位客人返屋企食飯，飯後隆而重之，開罐上級「碧螺春」飲吓，唉吔，弊弊冇咁弊，罐內除咗表面第一層係茶葉之外，其他冚扮爛係木糠，朋友既面紅，亦面黃（俾客人取笑做笨蛋也），雖不致怒火中燒，亦仰天長嘆，嘆息中國經濟增長咁快，啲增長率之中，有幾多係靠呃返嚟嘅呢？