馬會主席夏佳理可有為其「雙重身份」而矛盾？一方面身為馬會主席，最近又接手衞道之士視為洪水猛獸嘅賭波，一方面又係青年獎勵計劃（前身即愛丁堡獎勵計劃）前主席，兩年前更接替菲臘親王，擔任國際獎勵計劃協會主席。唔知佢怕唔怕俾衞道之士批評教壞細路呢？
噚日菲臘親王個細仔愛德華王子夫婦訪港，夏主席當然招呼周到，請身兼國際獎勵計劃理事會主席嘅愛德華及一班亞太區會員，去沙田馬會會所開會，順道於馬會主席包廂午膳，再順手請王子為第七場賽事「香港藝術節盃」頒獎，難得夏主席喺兩個身份之間都可以靈活走位。
講到噚日沙田嘅賽事，高官同過氣高官馬主都可謂馬場得意，前積金局行政總裁、新任馬會董事許仕仁愛駒「有聲有色」，喺李格力胯下大開勝利之門。而由俞宗怡、尤曾家麗、劉吳惠蘭及祝建勳等高官合夥擁有嘅「勝任愉快」，噚日第二次上陣亦取得勝利，執獎金三十二萬四千九百元，不過俞宗怡等人冇到場拉頭馬。
（圖）夏佳理（右）邀得愛德華王子（左）為「香港藝術節盃」頒獎，夫人索菲王妃（中）都有到場。
傳真︰2623-9278
電郵︰