踏入隆冬，寒風蝕骨，又是要補一補的時候，甚麼羊腩煲、蛇羹已是普通料，順德人另類補身法，就是食蟲，龍虱、竹蟲，大家又可有膽試？聽講兩者同樣蛋白質豐富，前者還有治夜尿功效㖭！我亦奉獻了我的第一次……
記者：陳冰麗 攝影：陳陶鈞
ImageGirl：Daniel
逢星期日刊出
龍虱即是水曱甴，見到它就想殺死的討厭蟲，順德人卻視之為佳品。酒家負責人黃先生最近剛由順德入了一批龍虱及竹蟲，有心試的話大可以家陣落定order，因為捧場客原來都不少。
「老人家同小朋友尤其啱食，我幾乎細細個食到大，味道唔錯㗎！記得細個嗰時成日要屙夜尿，阿媽聽人講食水曱甴可以止夜尿，於是就迫我每日食兩隻，連食兩日，估唔到夜尿真係少咗！」
黃先生重話龍虱兼有滋陰補腎、活血強筋的療效，男女都啱食。至於竹蟲，蛋白質零舍多，食一條等於食成隻蛋。黃生稱：「香港地唔係好多地方有龍虱、竹蟲食，大陸會多啲，我哋之所以引入呢啲另類食品，主要係因應食客嘅需求。有部份熟客因為喺大陸食過，返嚟香港後又好想再食，叫我哋諗諗有冇得做，於是就試試引入少量貨源應市，做咗個零月，反應都唔錯喎！」
拍攝當日若大廚非將一隻隻黑色六腳龍虱放在碟上，我一定會大大力用腳將牠們踩死！這種龍虱活躍於水中，大廚就這樣活生生地將牠們落鑊用椒鹽炒熟，在迫不得已之下，我就鼓咗最大嘅勇氣，獻出了我的第一次──食蟲。在剝去翼及腳後，隨即放入口，閉住氣嚼兩嚼，估唔到又非想像中難食，相反又幾香口，肉雖少但味道濃郁。
食完龍虱之後，大廚捧上另一種蟲，見到盤內在不停郁動的竹蟲，我的毛管已不期然豎起。同樣用椒鹽處理，這次我搵來Daniel一齊試，最先Daniel也有點抗拒，但在我和攝影師率先試試下，她亦開始敢慢慢放入口內。
大廚見我們愈食愈起勁，即刻拿出其他餸菜，雙冬扣果子狸，這是小記首次品嘗，還以為是羊腩，但食落卻較嫩滑。愛美的Daniel則至愛鮮奶燉水魚，貪佢又香又鮮甜，滋潤又養顏。
一両大概有10-12隻，利用椒鹽炒則較香濃惹味，但稍為會乾身些少，大廚話可以白烚之，食落較肥美，不過當然不及椒鹽香口，還帶有一陣腥味，未必人人接受到。
用的鮮奶是大水牛奶，奶白色的湯，鮮濃而不膩，香滑鮮甜。鮮奶養顏，水魚則夠滋補，最受女士們歡迎。
竹蟲乃寄生在竹節內的寄生蟲，順德人喜以酥炸方式烹調，再沾椒鹽略炒，吃來味更佳，而且沒有腥味。
地址：油麻地西貢街23號地庫
電話：27708832