有好多人會覺得呢類財務車意頭唔係幾好，因為唔少「銀主盤」嘅前任車主，都係因為財務問題而停止供車；但其實響風水玄學上，亦有簡單嘅化解方法，筆者特別走訪對風水玄學甚有研究嘅方海閱師傅，等佢教教大家點樣用火法、水法同撒買路錢來淨化呢類車輛。
火法 車主可到紙紮舖，購買一張黃色嘅百解同紅色嘅貴人指引，淨化時只需加一啲元寶溪錢便可；而淨化方法就係首先將百解、貴人指引、元寶及溪錢一併燃燒，順時針喺車身行一個圈，同時要念起百無禁忌咒：天無忌、地無忌、人無忌、年無忌、月無忌、日無忌、時無忌、百無禁忌、萬事如意、大吉大利。
水法 用完火法後可再用水法，事前須準備一桶水，並在水內加入柚葉、柏葉、黃枇葉，先在車廂內進行灑水潔凈，然後再響車身外殼撒淨，期間可念讀百無禁忌咒，咁樣就可以將車子嘅衰氣推出車外；如果想汽車能帶旺自己，可在水中放入黃水晶，因黃水晶可催財，而如果想頭腦清醒啲嘅話，更可加入紫水晶。
撒買路錢 進行完火法及水法後，就要準備以9字作尾數嘅硬幣（例如$0.9或$9.9），站在車頭面向前方將硬幣撒出便可；完成呢三個步驟後，便可將車子嘅衰氣同霉氣驅掉。
化解車牌數字都有計
部份財務車配有頗「靚」嘅車牌，如3388、3688等等，但新車主又怕該車牌未能帶旺自己；據方師傅表示，其實每個車牌數字同車主嘅關係，都係因人而異。如果車牌中有1、6、8數字都較好，而9字亦唔錯，因為代表有喜慶事，相反車牌有3字就代表是非，車主可響車內放紅色裝飾物化解、2字則代表病痛，可放金屬或金飾化解，而5字則代表意外之災，可放金色裝飾化解。