上個禮拜個市升得好哋哋，不過仍有個別股仔落得大跌收場，尤其隻中國特種纖維（285）被猛烈空襲，股價由之前1蚊樓上，急跌至停牌前8仙9，有好幾隻股仔都曾經俾大量沽盤推低過，隻新醫藥（8085）更喺上星期五復牌後，俾人由1.17元炸到得番1仙6，雖然話隻股曾經反彈到3毫半，但收市時得番2毫7，唔見咗七成六。
伏勝同班經紀朋友都覺得好奇怪，兩隻股仔嘅街貨唔算好多，冇理由可以有咁多貨掟出嚟。伏勝聽聞一個較為特別嘅古仔，話說隻特纖喺出事之前，有個大戶銀包制水，攞住成幾千萬貨周街問人要唔要，重話可以有3成折讓，不過由於個市都幾水緊，結果當然冇人肯要。
有人傳佢一怒之下喺條街度掟貨，雖然佢成功出晒貨，但亦觸發其他行嘅斬倉盤，結果一發不可收拾。聽聞今次單嘢都會幾傷，皆因低位接貨博撈底嗰一班散戶，喺復牌嘅時候，可能重要玩多一次生死時速，鬥快沽股出街。
雖然有股仔爆煲下跌，但有好多嘅二三線股仔重係咁生猛，好似啱啱公布入咗文傳（343）持有嘅中文2000平台五成一股權嘅意科控股（943）咁，就唔聲唔聲爬到上2毫1樓上，成交額重大幅咁升到上去每日千幾萬股，鑊氣十足，相信只要東風一起，就會揚帆起航。
聽班經紀朋友講，話隻股個搞手已經搵咗成班大戶出嚟傾偈，隨時可能有後着。又話已經有幾隻「晒士」頗大嘅春江鴨喺魚缸度吸緊貨，所以不妨細細注玩吓，分分鐘可以執番十零二十個巴仙。
伏勝