香港四乘一百米接力隊成員杜韋諾在去年全運，以破紀錄的成績奪得一面難得的接力銀牌，將田徑事業推上高峯，可是今年狀態轉沉，成績再無法突破，不過，這並未影響其鬥心，「阿諾」志切明年回復狀態。
他說：「今年成績比較差，原因有好多。早幾年猛咁拼搏成績不斷進步，係全運攞到好成績，之後心理比較疲倦，可能因為咁所以今年成績都唔理想，亞運亦跑得麻麻。」
「首要目標是回復應有水準。現階段唔會諗得太長遠，先解決眼前的問題，望係明年嘅亞洲賽跑好些，而較為長遠少少是四年後的亞運。」
「不同人對好朋友都有唔同嘅定義，在我心目中，『陳麒』絕對係真心嗰種。在他面前，基本上甚麼都可以講，當然包括心底話。識他多年，說真的，他從來沒有試過令我失望。可能大家都喜歡運動，性格同心智比較接近，由於佢唔係田徑圈內人，聽到佢嘅意見，對解決問題會有幫助。」
出道五年的陳家麒足球事業起跌甚大，有批評指他為人心高氣傲，而他上季助南華奪得三項盃賽冠軍，今季卻不獲續約，最後轉投晨曦，對於這些風雨，「陳麒」表示不介意，更希望將來有機會出外一闖。
他說：「在球圈都有好多人講好多嘢，我就從來唔理，總之做回自己本份，亦唔會因啲閒言閒語而影響表現。」
「我一直都想去外國踢波，這個心願驅使我要求自己多些，提升自己的技術，看日後有沒有機會出外一試。南華不與我續約可能有其他因素，而每個球員都會經歷轉會，這是很平常的事情。我咁年輕，球員生涯只是開始不久，還有很多將來。」
「識『阿諾』嘅人都知他好貪玩，對跑步好執着，同好想破紀錄，每場比賽都希望做到最好。好似有時他比賽完，會主動同我講『其實今日可以破，天時地利都夾晒，但始終係唔得』，而我就會鼓勵番佢，同佢講番，只要畀心機，一定有一次可以做到好成績，達到預期目標。」
在香港當全職運動員並不容易，既要為比賽成績煩惱，也要為前途而粗心，而家人及朋友的支持更是不可缺；「陳麒」同「阿諾」當遇到問題就會主動聯絡對方，聽聽對方的意見，儘管不是每一次都能夠幫到對方，但過程中兩人互相扶持及關心，這種關係可真叫人羨慕。