夢幻隊慘敗？NBA唔好睇？佐敦力不從心、兼且頻頻輸波？以上種種在十年前聽起來不可思議的事一一出現。對我們一班NBA球迷來說，還有甚麼可以慰藉？有！就是復刻版的AirJordan7代。圖?文：仙道彬
將AirJordan7攞上手，第一個感覺是彷彿回到十年前的NBA光輝歲月。呢對鞋係佐敦效力公牛91──92球季時穿着；除咗陪佢力壓拓荒者、蟬聯NBA總冠軍外，亦都陪佢開啟夢幻之隊既傳說，以萬人景仰姿態輕易奪取奧運金牌。
講到遠咗少少，但返到去對鞋上面，真係唔係太多嘢可以講，畢竟已經係十年前嘅波鞋。着上腳，雖然個底薄咗啲，不過仍感受到嗰份舒適。AirJordan7設計得非常貼地，而且內置的air鞋底亦都比想像中「軟」；加上鞋底的圓形坑紋，對一個要經常急停、轉向及跳躍的後衞型球員都幾正。
而鞋內櫳的「內裏」設計雖然𠵱家比比皆是，但當時可以話係革命性嘅設計；加上高過腳眼的後踭「護翼」設計，令到部份唔鍾意低、中筒波鞋的人亦能接受，亦都提高咗呢對鞋嘅保護功能。值得一提係呢二塊「護翼」其實都頗軟，所以唔使驚有「刮」腳情形出現。
有幾多樣嘢可以睇足十年都覺得靚？絕對唔多，不過AirJordan7就係其中一樣。將6代嘅外露Air改為收喺鞋入面，然後簡單咁將不規則嘅三角形分布喺鞋舌、鞋踭同鞋底部份；加上鞋舌位上面原汁原味的AirJordanLogo，同埋23號標誌，真係睇足十年都唔厭。
假如你唔「嫌棄」Jordan7係波鞋科技上面已經過時而仍然諗住買，我會建議你買黑色。因為黑色比較原汁原味，加上用色好搶，紅撞紫非常醒目，鞋底更加係「勁」靚。
總括嚟講，呢對鞋值得收藏，但係攞嚟打波就爭啲啦。假如你想買對鞋用嚟打波，新嘅鞋款當然好啲；如果你係Jordanfans，或者純粹收藏，都可以話係mustbuyitem嘅！
雖然有復刻版的推出，但原版的AirJordan7仍然係「高不可攀」。尤其係佐敦着嚟打奧運嘅特別版最「稀有」。呢對鞋背印咗9號（佐敦打奧運時球衣號碼）嘅特別版，家陣喺e-bay上面可以賣到$4,000以上，可以話係最貴嘅波鞋之一。
蟬聯NBA總冠軍
常規賽/總決賽MVP
NBA最佳陣容
NBA最佳防守陣容
憑30.3平均得分膺該季得分王