停牌兩個月嘅新醫藥（8085），噚日復牌又玩笨豬跳，重演早幾日中國特種纖維（285）勁插一幕。
不過，同小初一樣愛冒險嘅經紀陳，竟然笑笑口咁同小初講，話佢新醫藥成功博反彈，執到多少。佢喺10仙買入，20仙沽出，都賺咗成倍。當然呢樣嘢，完全係靠勇氣同膽識，同賭錢冇乜分別，稍為穩陣嘅人都唔會咁做。
新醫藥噚日最低1.6仙，收27仙，跌77%，成交股數高達6億股，成交金額9590萬元。
至於因乜事隻股俾人沽得咁重？經紀陳話，其實全港嘅證券行都知呢隻股按倉按到出晒火位，加上停牌前炒咗好耐，但又批唔到股套現，炒家結果找唔到數，停牌之時已經有證券行準備totalloss，所以隻股噚日復牌玩笨豬跳，基本上係意料中事。
至於隻股後市會點？睇番以往嘅正中藥業（327）同兆晉（491），重創之後都無法收回失地，大約估到新醫藥嘅未來。
慕容小初