名模楊崢、陳嘉容和李嘉慧等昨日先後在中環和蘭桂坊演出HairShow和FashionShow，其中楊崢的男友Pius是HairShow主辦單位O4Osmosis負責人，她似乎受到特別優待，Pius更為她挽鞋，十分體貼。
昨日一班本地名模包括陳嘉容、李嘉慧、Rosemary和楊崢先在髮廊O4Osmosis演出HairShow，然後再在蘭桂坊中國坊酒家示範本地時裝設計師的新作。各設計師的作品各具特色，發揮出本地薑的實力。
與O4Osmosis負責人Pius拍拖的楊崢，昨日演出時似乎得到特別優待，她換衫影大合照時，Pius更為她挽涼鞋，但楊崢再次否認與對方拍拖，她說：「我同佢都係因為工作先多接觸啫。」早前Rosemary表示如要她剪短頭髮，就要收取一架法拉利跑車作酬勞，楊崢昨日亦表示如非獲得優厚酬勞，她亦不願把秀髮剪短，她說：「我就唔使要跑車，不過都要一層平平哋嘅樓啦。」
另外，陳嘉容剛從日本旅遊返港，她說：「本來諗住去迪士尼玩，但日本突然落大雨，所以取消咗呢個行程，淨係買咗四頂帽返嚟啫。」陳嘉容表示現正忙於籌備明年出版的美容書，她說：「呢本書大致上係將自己嘅化妝同美容心得跟讀者分享，除咗撰文外，我重會畫埋公仔㖭。」
問陳嘉容又出書，又擔任客席模特兒導師，是否想淡出模特兒界？她對此說：「當然唔係啦，我淨係想趁後生嘗試多啲嘢啫，有機會我重想設計飾物㖭。」
採訪:RitaLeung、JessicaNgan
攝影:RickyChan