羅敏莊同男友陳國邦嘅戀情最近俾傳媒踢爆咗，事業愛情兩得意嘅羅敏莊呢排真係好旺，佢嗰頭喺無綫台慶夜抽中價值六十萬嘅樟木頭御景花園洋房同埋六萬蚊現金，呢頭馮仁昭收到風話佢同男友陳國邦明年拉埋天窗，真係雙喜臨門。
問羅敏莊係咪已經收拾心情做羊年新娘，佢噚日喺電話度講：「我哋未結婚住，係都生仔先。我好鍾意小朋友，將來希望可以生一個囝囝，因為同囝囝相處，就好似同囝囝爹哋拍第二次拖咁。基本上我都冇乜嘢計劃，等有咗BB至算。」
羅敏莊同陳國邦拍咗幾個月拖，佢話：「我媽咪都讚佢份人好好，我就畀佢滿分。」而陳國邦噚日亦喺電話度話：「我嘅人生唔係每件事都有計劃，我比較鍾意順其自然。」馮仁昭覺得結婚始終係開心事，唔使咁收埋嘅！
任劍輝逝世十三年，噚日係任姐嘅死忌，佢班徒弟去咗仙姐跑馬地寓所逸廬拜任姐，再陪仙姐食吓飯同打吓麻將。隨住仙姐年紀愈嚟愈大，佢都深居簡出，所以每逢任姐生忌、死忌，或者仙姐生日呢類紀念性日子，班徒弟同老友就會去陪佢。
噚日晏晝三點幾左右，譚倩紅同個朋友就去咗陪仙姐。林錦堂同陳寶珠（右）都有去，寶珠姐話：「年年都係咁，上去食飯囉，叫到會。」
林海峰（阿Jan）將會喺下個月十八號舉行《拉闊音樂會壓軸篇》，到時台灣嘅糯米團同楊千嬅會做嘉賓。商台幫阿Jan大事宣傳，搵咗一班歌手錄宣傳帶，講吓想阿Jan表演啲乜？張學友話成日見到佢健身好大隻咁，想見到佢露吓肉，而何韻詩話想見到佢扮F4，一人分飾四角。鄭經翰最好笑，佢話：「乜林海峰識唱歌㗎？唔係佢老婆識唱咋咩？」阿Jan老拍檔葛民輝最無厘頭，佢話：「我想林海峰喺拉闊音樂會拉到好闊畀我睇。」
蕭正楠噚日去新城做訪問，佢透露啱啱同三T嘅成員Mandy（蔣雅文）去咗TVB試造型。佢兩個出年一月會幫無綫拍個古裝劇，佢試咗個展昭嘅造型。問佢怕唔怕俾人話用拍劇嚟換獎，蕭正楠話自己拍劇嗰時已經過晒啲頒獎禮，所以應該唔會俾人話喎！