中銀香港（2388）收市前十幾分鐘，忽現奇景，由8.45元開始大掃貨，幾乎板板30萬股（每手500股，最多600手），掃到上8.70元坐正掛買盤，電腦判收8.65元，升25仙，升幅3%。
急升理由，事後孔明式解釋，係中銀下周一正式列入恒指成份股，指數基金要計比重揸貨，但難明解嘅係，點解先幾日唔收集收集，要昨日臨尾市大掃貨，掟成十億八億落去？
中銀彈升，中銀Call輪有啲「及時」反應，有啲冇乜反應。最有反應嘅係9521、9554、9625等，依次升幅係41.6%、21.3%同20.7%。其中9521係高溢價、高槓桿率嘅Call輪，其他兩件則普通。最冇反應嘅最活躍嘅9462，只係由13.9仙攀上14.3仙，升幅2.9%，連正股升幅亦有不如，大概受到疏忽。假如正股下周一企定唔跌，呢隻輪應該會裂口性上升，冇乜理由其他輪隻隻有溢價，呢件則幾乎平水，話晒明年7月至到期。
第5大升幅輪係Q仔公司輪609，收24.4仙，有人掟18萬銀買嘢。品質國際（243）昨日冇升，跌2.5仙。就算升，609都唔應該咁跳法，雖然有25個月命仔，但溢價215%，槓桿率8.4倍，點值咁嘅溢價？隻輪行使價6.25元，正股𠵱家至係2.05元。609咁升，係格硬嚟。
章盛