民主黨主席李柱銘噚晚最後一次以主席身份見老董，記得雙方五年幾前第一次見面，大家都笑騎騎，但係噚晚一講到民主、二十三條始終拗到火紅火綠，無法好頭好尾。
馬丁自己講笑，佢唔做主席，老董肯定好開心，而新主席楊森同阿董嘅化學作用唔同，可能佢哋溝通或者可以好啲。但轉個頭，馬丁又推翻之前嘅講法，話自己同老董都捧利物浦，利物浦贏多兩場波，大家都有多啲話題；但係楊森就係曼聯擁躉，呢兩隊波係歡喜冤家，第日曼聯贏咗利物浦，老董同楊森重冇偈傾。
白鴿黨今次都好有心機，帶晒佢哋出嘅經濟報告、施政報告畀老董，馬丁話希望老董今次可以認真睇清楚，唔好係咁意「立」吓，就話白鴿黨只係識批評，其實佢哋都做過好多有建設性嘅建議，只係老董聽唔入耳啫。
傳真︰2623-9278
電郵︰