踏入十二月，各大廠商紛紛推出旗下皇牌遊戲，務求喺嚟緊嘅聖誕分一杯羹，率先揭開戰幔嘅有《BioHazard0》同《SDGUNDAMG-GENNEO》，啱啱又推出埋《DarkChronicle》，不過講到RPG迷最期待之作，可算係NAMCO呢隻《TalesOfDestiny2》喇，新作大玩連技戰鬥系統，令遊戲刺激度大大提升，而且重搵嚟人氣歌手唱主題曲㖭。
記者：徐影龍
嗚謝：SCEH
講起RPG，相信大部份人都覺得花費時間儲等級，屬苦樂參半，因為等級愈高，升級所需時間愈長，有時都幾沉悶，不過見到主角成長，漸漸學識更多嘅必殺技時，嗰種滿足感亦非筆墨所能形容。幸好《TalesOfDestiny2》將格鬥Game中必備嘅連續技玩法，引入戰鬥系統裏面，打起上嚟要不斷按掣組合成連續技，拳拳到肉之餘重好有爽快感，加上主角可將普通技連上必殺技組合而出，成為終極必殺技，主角嘅氣勢同攻擊力都倍升，對首領戰必用。
一隻RPG受歡迎，除咗聲靚畫面正外，故事當然亦係重要一環，而《Tales》系列嘅故事一向都有唔錯嘅口碑，好多機迷都期待今集嘅故事，打打殺殺之餘，亦可有啲動人嘅情節。遊戲中男、女主角將會面對同伴間嘅離離合合，除愛情外重有唔少友情嘅描寫，令遊戲更有深度。至於基本系統上同舊作分別不大，城鎮內以傳統2D表達，雖然唔可以轉換視點，不過大小建築物描繪會更細緻逼真，當離開城鎮後便以全3D表達，可自由轉換視點，話唔定一啲隱閉嘅山洞要留心先發現到，算係一個較大嘅突破。
上個禮拜台灣啱啱宣布咗《TalesOfDestiny2》會完全中文化，而傳聞更指配音會一併改埋國語㖭，預計2003年春季登場，對於香港人梗係難能可貴啦，因為要將RPG改成全中文，工程可謂非常浩大，比一般嘅智力或動作Game需要更多時間，從呢點可睇到NAMCO對中文市場嘅信心，香港人玩起上嚟都唔會不明不白咁打爆機。嚟緊12月21日嘅亞洲遊戲展，《Tales》系列嘅金牌監製吉積信更會出現，大談開發中文Game苦與樂，更會即場同Fans簽名留念㖭。
(c)MutsumiInomata.(c)9972002NAMCOLTD.,ALLRIGHTSRESERVED
近年一啲RPG大作，都興起搵歌手唱遊戲主題曲，連王菲早年都曾為《FF8》唱過《Eye'sOnMe》。此舉不但令玩家對遊戲更有共鳴，更可帶出遊戲嘅主題思想。NAMCO曾喺東京遊戲展2002宣布新作將由人氣女歌手主唱，到今日終於開古，就係日本典型鄰家女孩Feel嘅倉木麻衣喇。淨睇歌名《KeyToMyHeart》已經知屬埕埕塔塔類型，唔知遊戲內最終會否出現驚天地、泣鬼神嘅愛情故事呢？
官方網址：