上星期六講電盈新附屬公司Cascade，令才女L唔滿意，因為小瀑布流水下瀉，唔係幾好意頭也。不過才女L與左丁山都唔係科技人，對英文字嘅新義，或有所不了解。
一位長期讀者TingHans來英文電郵指正。Ting先生話：「Cascade嘅現代意思，點止瀑布咁簡單，牛頓電訊字典（Newton'sNewDistionary）指cascade嘅意思係：接駁一件儀器（device）嘅出口到另一件儀器嘅入口，而另一件儀器又接駁到另一件……」另外《BBC英語字典》話：「大群事物的聚集，如一篇講詞聚集了記憶、幽默，及大量意念。」
左丁山的中譯，甚為馬虎，簡而言之，cascade嘅現代意義是含咗中介、累積、意念聚集、一環扣一環、傳遞信息媒體等等意思。所以Ting先生話「電盈附屬公司，專做網絡服務生意，名之為Cascade，甚為適宜。」讀者T講嚟，冇話唔啱。不過取名之要害，係普通人一睇就明，就即刻吸收。我哋呢啲非techie，見到Cascade就會想起「瀑布」，相信大部份市民都唔知道呢個字喺「電子學」內裏嘅意義，讀者T相信係對科技電子有認識之人，與我哋唔同一個bandwidth（還是wavelength？），總之，多謝指教。
另一位讀者張來電郵話，有關王于漸講述樓市係通縮嘅主要原因，詳見月刊《戰國策》十月號；王于漸嘅意見與雷鼎鳴（科大經濟學教授）、丁竹筠（高盛地產分析師）完全唔同，信邊個，由得你。