投資公司富泰大中華（1226）9月掛牌上市，由招股價0.50元升到本月初1.34元後，一度靜咗一排，噚日公布業績後，升勢再現，大升5.2%，收1.41元，又再創上市後新高。呢隻股嘅表現，完全係違反傳統智慧，亦令話投資公司冇得炒嘅人受到教訓。
富泰大中華剛公布今年4月26日至9月底止中期業績，賺咗186.42萬元，派息5仙，同埋1送1紅股。睇真公司業績通告，所謂百幾萬銀盈利，其實係投資股票嘅未變現溢利，即係帳面富貴咁解。至於公司揸咗乜嘢股票，業績通告雖然冇講，但查看紀錄，原來係持有盛創企業（8108）十幾個巴仙股權。睇完業績通告後，小初只能講一句，的確係高手。
至於富泰大中華1送1紅股，唔使問阿貴，都知道係變相拆細，博炒多轉咁解。不過，呢類股份究竟有乜人跟炒，而炒家又散唔散到貨，小初真係唔知道。不過，小初就唔夠膽亂跟。
慕容小初