呢晚在山光道馬會食晚飯，九點零鐘，見到賓架W怱怱離席而去，於是企起身與佢打個招呼，問佢點解走得咁快。賓架W話要去九龍灣夾band，練習吓唱歌。乜咁認真呀？到卡拉OK練吓唱就得啦！
賓架W話：「你有所不知，十二月尾有投資銀行界盛事，啲老鬼賓架、財務董事、CFO，冚扮攔會參加一個大party，唱歌跳舞，玩鋪勁嘅。𠵱家好多人已經報咗名上台唱歌，我哋要去練習多啲至得。」
於是打電話畀賓架F，問佢十二月尾有乜好嘢，賓架F話：「是晚美林證券投資銀行部董事總經理黃桂林（K.L.Wong）與太太慶祝結婚二十五周年，到某大廈七十三樓開party，邀請啲賓架、CFO及老友記參加。到時九鐵副財務董事張慶（JeffreyCheong）親自與老友夾band演奏五六十年代嘅金曲，消息一傳開，好多理財界、金融界歌王踴躍報名登台獻唱，可能要爭咪都似。」
黃桂林在本港銀行界服務四分一世紀，做過美華銀行總經理、渣打亞洲、瑞士第一波士頓董事，在美林服務多年，𠵱家各大集團機構啲CEO、CFO都同佢相識已久，佢開銀婚慶祝會，熱鬧必矣。記得去年葉澍堃、張永森及另一位港大七三年畢業同學一齊慶祝結婚二十五年，喺城市花園酒店地庫開party，好多港大名人爭住唱歌，鄺其志夫婦重猛咁跳舞㖭，相信呢次黃桂林開P，亦有咁哄動！