羅嘉良早前往寧波，為其任代言人的內地時裝品牌舉行簽名會及行catwalk。由於當地正播映嘉良演出的劇集《難兄難弟》，掀起一片「李奇」熱，首次踏足寧波的他所到之處都有大批fans圍觀，簽名會更中途腰斬。
羅嘉良早前在無綫台慶頒獎禮中，憑《流金歲月》一劇第三度奪得「我最喜愛的男主角」獎。近日羅嘉良首次往寧波，為其擔任代言人的內地服裝品牌「太平鳥」，進行一連兩日的宣傳活動，其間他更舉行簽名會及行catwalk。
羅嘉良當日先在一個廣場的商店內舉行簽名會，因寧波現正播映其主演的經典劇《難兄難弟》，他在劇中演「李奇」，在當地掀起一片「李奇」熱，他所到之處都有大批fans圍觀，所以簽名會開始不及兩分鐘，保安見fans不停擠進，為免發生混亂即腰斬簽名會，並安排羅嘉良從後門離開。
日前羅嘉良接受本報電話訪問時說：「嗰日我搞簽名會，一落車就見到好多人，我迫咗好耐至入到場。簽咗幾個名之後，大家都覺得唔對路，因為出面嘅人係咁迫入嚟，啲保安驚迫爆玻璃，所以好快就停咗個簽名會。我行後門走都一樣咁多人，迫嚟迫去好似打仗咁。」
當晚羅嘉良更為時裝表演行catwalk，他說：「嗰晚都好唔得閒，因為同場有好多內地model，佢哋喺後台頻頻搵我影相簽名。夜晚我返到酒店，諗住去咖啡室飲杯咖啡，但係都唔得，因為又係好多人，可能我一路忙拍劇，少去內地宣傳，啲人至咁熱情，不過我都開心嘅。」
採訪：朱芷瑩