感恩節送大禮，美股前晚勁升，美國人今晚可以快快樂樂食火雞。港股在外圍帶動下高開，但今回唔再低收，恒指升逾兩嚿，成交亦見配合。昨晚美股休假，今晚亦只得半日市，若無突發意外，港股今日可以更上層樓，月線圖留下一支大陽燭，靚晒。
長和發威，長實（001）一跳就4%，和黃（013）亦升3.8%，跑贏其他大藍籌。長和近半年走勢落後大市，超人唔會咁失威，好有機會追番，長和Call輪要揸番啲。
長實Call輪始終係9517最當炒，明年2月24日屆滿，現價59仙，溢價3.7%，槓桿率9.8倍，數據算靚。不過，行使價54元，已屬價內輪，正股若再大升，9517嘅爆炸力將略減。
想搏殺，可考慮9426，明年2月4日到期，現價17仙，溢價11.7%，槓桿率34倍，行使價62.8元，爆炸力大啲，風險亦高啲。
和黃Call輪主角一向係9518，買賣容易，數據亦唔錯，屆滿日同9517一樣，溢價2.8%，槓桿率8.2倍。行使價49.6元，正股做緊54.75元，屬價內輪，但勝在較穩陣。
鍾意搏殺嘅可能會揀9407，行使價57.5元，5%價外，溢價7.5%，槓桿率40.6倍，夠晒爆炸，但屆滿日係明年1月10日，12月假期多，9407查實已屬末日輪，炒佢要知風險。
章盛