國泰噚日可謂雙喜臨門，喺香港連續第五年奪得《壹週刊》「服務第壹大獎」，喺法國亦啱啱接收最新租用嘅新型空中巴士。
國泰今次收飛機，撞正梁錦松訪歐，結果請到財爺為佢哋嘅飛機交接儀式錦上添花。國泰董事兼常務總裁陳南祿，陪住阿松去到法國南部圖盧茲嘅空中巴士廠，接收呢架價值一億九千萬美元（約十五億港元）、長246英呎、由四個勞斯萊斯Trent500引擎驅動嘅空中巴士A340-600。呢架飛機機身特輕又慳油，航程達一萬三千九百公里，去紐約可以直飛，毋須停溫哥華。
八方又收到風，國泰萬多名員工日望夜望嘅雙糧，就快有着落，短期內會公布，有啲空姐亦都話雙糧應該會喺十二月底發放，重已經計劃緊點用呢筆錢㖭！
（圖）空中巴士公司副行政總裁JohnLeahy（左）同梁錦松（中）及陳南祿，為空中巴士髹上國泰標誌。
傳真︰2623-9278
電郵︰