今年樂壇新人輩出，喺年底舉行嘅頒獎禮爭獎情況一定比往年激烈，加州紅卡拉OK今年重加入戰團，喺嚟緊嘅十二月五號搞個「加州紅熱點新紅人巡禮」，頒獎畀一啲喺卡拉OK場所內有高點唱率嘅新人歌手。
其實歌曲喺卡拉OK俾人不停點唱，就足以證明首歌好掂，所以班新人為咗證明自己嘅實力，個個都向加州紅爭攞獎。馮仁昭八到，話爭獎爭得最出位嘅都算係有錢仔麥浚龍（Juno），佢最近出咗首新歌《有人》，點唱率竟然喺幾日內激增萬幾次，連行內人都話誇張，重笑住咁話唔通有錢真係乜都得？
據聞Juno唔單止爭奪卡拉OK獎，就連頒獎禮壓軸表演都要爭，但結果都輸咗畀Shine，於是Juno只好退而求其次，打頭陣演出。而加州紅最後決定頒一個「跳躍新人獎」畀佢。
除咗Juno外，英皇3T爭獎都爭得好霸道，本來加州紅諗住畀一個獎佢哋三個，但點知佢哋嫌唔夠，一定要一人有一個，卒之Yumiko就得「火熱新人獎」、Maggie就得「性格新人獎」，Mandy重好笑，佢得個「純情新人獎」，純情都可以攞獎，都係第一次聽。
趙頌茹（阿Yu）噚日接受新城電台《一個靚墟》嘅訪問。阿Yu近日積極備戰，準備下個月喺《新城唱好葉蒨文真我在舞台演唱會》入面擔任表演嘉賓。阿Yu話自己對腿好似「斷咗」一樣，佢話：「今次係我第一次排舞，已經排咗三日，日日要排四個鐘，簡直係地獄式訓練，𠵱家隻腳好似斷咗咁。我又雞手鴨腳，有時都會踩到人，葉蒨文勁過我好多。」
肥姐沈殿霞噚日出席舞台劇《麗花皇宮2003》記招，肥姐同記者講由於早排喺籮記嘅喪禮上着咗兩日高踭鞋，搞到腳趾生咗個水泡，加上佢有糖尿病，所以個傷口就比較難埋口。不過醫生警告肥姐，如果佢個傷口再惡化就有可能要鋸咗佢隻腳趾，所以肥姐今日就着咗對人字拖出席記者會。
盧淑儀、王合喜同中國奧運跳水金牌得主田亮噚日出席Amway營養補充品記者會。盧淑儀話自己強項係游水，佢話：「我學咗成十年，已經可以教人哋游水。」問佢識唔識田亮？盧淑儀初初話唔知田亮係邊個，不過當記者話佢知田亮係奧運跳水金牌得主，盧淑儀即刻轉軚話：「田亮都係我偶像嚟㗎。」
趙雅芝前晚去跑馬地馬場，專程同佢嘅朋友隻馬打氣，問佢有冇下注，趙雅芝話：「因為我嘅朋友有馬出賽，所以我專登嚟捧佢場。」之後趙雅芝就同老公黃錦燊會合，一齊吃晚飯後才離去。
而李國寶太太潘金翠嘅胞弟潘廸生前晚亦出現跑馬地馬場，對於其姐夫李國寶早幾日同廖碧欣喺灣仔撐枱腳一事，潘廸生拒作回應。