紐卡素前晚喺歐冠盃又再次主場輸波，比拿美攞紅牌出場成為輸波罪人唔使多講，但係全場見到紐記班球員同球迷都咁搏命，真係值得一讚！
論級數，紐卡素就肯定唔及國際米蘭班球員，之不過講到鬥志，英超聯球員始終係各個聯賽最好；話晒比拿美好早已經被趕出場，紐記班球員差不多全場都係十人應戰，所以去到比賽末段都冇放棄，盡量爭取入球，精神可嘉。
重有嘅就係紐記班主場球迷，睇住球隊落後三球情況都冇話向主隊柴台，而且當蘇蘭奴入番一球時，「公仔箱」影住主場球迷笑住拍掌，唔係每隊波擁躉可以做得到。雖然我求大俠覺得舒利亞向簡拿華路開踭都應該攞紅牌，但場波真係好有球味，捱眼瞓都抵！
球迷或者會奇怪喺禮拜三羅馬對阿仙奴場波，點解唔見施文落場。而據外電講，施文因為鼠蹊有傷倦勤，所以佢哋領隊雲格就用沙賓把關。之但係，唔好話我求大俠陰謀論，唔知係咪雲格見施文呢輪咁黑，出親場佢哋都輸波，於是就索性用之前打兩場都冇失過一球嘅沙賓守龍門。講真呀，施文咁老，都係時候退位讓賢嘞！
富咸喺足協盃次圈次回合主場對薩格勒布，只得七千幾人入場睇波；由於佢哋喺第三圈次回合主場對哈化係開星期四下晝五點（英國時間），所以龍門雲達沙擔心到時得嗰小貓三四隻入場，就諗住自己出錢請喺荷蘭啲朋友嚟充撐場面。雖說雲達沙可能係得幾廿個朋友嚟睇波，但佢對足球咁有熱誠同對球會咁支持，實在抵讚。
人紅自然新聞多，好似姚明咁，就有傳媒指佢嘅火箭隊友法蘭西斯雖然經常同姚明講好話、維護姚明，但其實喺操練同比賽期間，就好少同呢位中國球員溝通，原因係姚明逐漸冒起，成為佢嘅威脅咁話。但照我求大俠所知，報料係中國記者，唔知佢哋係咪多心抑或過於緊張姚明被冷待，呢啲嘢都係聽住先啦！
成立咗只得三年嘅WNBA邁亞密陽光噚日宣布，因缺財源下季要「關門大吉」。真係同人唔同命！NBA愈搞愈旺，啱啱話喺下季將球隊數目由二十九支增加至三十支，點知同出一脈嘅WNBA就愈搞愈沉，來季將要由十六隊收縮為十五隊。其實WNBA近年嘅入座率同贊助收益都唔理想，如果官方唔儘快諗計救市，好可能有愈來愈多球會要倒閉。