由九○年開始舉辦以來，「《壹週刊》服務第壹大獎」唔覺唔覺已第十三屆，今次有十九個機構獲得「服務第壹大獎」，金獎由網上行奪得。
噚日個頒獎典禮黎智英都有到場，大班記者當然唔放過佢，圍住肥佬黎係咁問台灣《壹週刊》及台灣《蘋果日報》嘅消息，但睇嚟佢哋都幾失望，因為肥佬冇乜料爆。
上到台致辭，肥佬黎點都要講番幾句，佢話以前做時裝零售連鎖店，𠵱家做傳媒，最大分別係冇咗舖面，但一樣要重視服務質素，要做到同讀者感同身受，要關心甚至幫手解決讀者嘅問題。
另一主禮嘉賓《壹週刊》社長楊懷康，就講咗個古仔；話說佢喺北美洲行書店，店內有位五十幾歲印度籍店員，楊社諗住考吓佢，於是問有冇FrancisCrick（福蘭西士．克里克）嘅書。
克里克係六二年發現DNA雙螺旋結構而獲得諾貝爾獎嘅科學家，都幾冷門；點知呢位店員，聽完粒聲唔出，即刻攞出本克里克嘅自傳《WhatMadPursuit（瘋狂的追逐）》畀楊社。一個店員都咁投入佢嘅工作，知道乜嘢係DNA、邊個係FrancisCrick，令楊社非常感動，話咁先係良好嘅服務態度。
傳真︰2623-9278
電郵︰