鄭秀文（Sammi）近日被指與許志安分手，許志安日前更與吳國敬、張衞健到泰國布吉島旅遊，而Sammi前晚亦心情輕鬆地和助手去做腳底按摩，離開按摩店後還跳蹦蹦，昨日亦如常拍戲，心情絲毫不受影響。
鄭秀文與許志安傳出正式分手後，許志安日前便與吳國敬、張衞健到泰國布吉島旅遊。同時有報道指Sammi會轉攻電影，淡出樂壇，連年底各樂壇頒獎禮都缺席。Sammi前晚十一時許在助手陪同下，到跑馬地足婷軒做腳底按摩，她離去時蹦蹦跳的，十分愉快。昨午她與古天樂在新世紀廣場拍攝電影《百年好合》時，亦笑容滿面但不接受訪問。
自去年Sammi減少宣傳工作後，一直有傳她淡出娛圈，但日前Sammi接受本報專訪時對此否認外，明年亦會推出四張唱片，而獎項對她而言已不重要。
問Sammi為何減少宣傳工作？她說：「心態有些少轉變，冇以前咁瞓身去衝。」甚麼事讓Sammi有此轉變？她說：「之前我爸爸病咗，對我影響好大。以前我以為自己最重視工作，但到重要關頭，我先知乜嘢最重要。卒之，我學識凡事唔使咁執着，有嘢亦唔好放喺心度，好似我錫家人，就要講出口。」
Sammi是否已感到累，有否計劃退休？她說：「我唔係攰，只係步調放輕。人生有好多變數，唔使計劃得太遠。我更加唔會輕言退休，上次話我退休係我言語表達上令人誤會，竟然嚇壞fans，我唔會再亂咁表達心情去傷喜歡我嘅人嘅心。」
至於是否將重心放在電影上？Sammi說：「電影同音樂係相輔相成，音樂係要靠電影幫，呢樣嘢我三年前已經開始緊，但唔代表唔唱歌，我明年一樣出三張廣東碟一張國語碟，唱片公司合約訂明晒，唔係隨便可以唔做㗎。」
Sammi又如何看獎項？她說：「獎項已經唔係我工作嘅重心，音樂嘅獎雖然我都得過，但人哋重畀我嘅話，我都好開心。攞唔到金馬獎我亦冇失望，有提名已經係認同，攞唔到反而重有目標。呢啲嘢我向來隨遇而安，識得唔再執着，人就會變輕鬆，開心就得啦。」
採訪：蔡如玉、馮美茵
攝影：娛樂突發組