梁家輝早前涉嫌酒後駕駛及毆打傷人，他昨日出席有份主演的新片《雙瞳》之宣傳活動時表示，當日未有料到酒後駕駛會遇上交通意外，由於案情仍在調查中，梁家輝現階段只可以講六個字：「經一事，長一智。」
梁家輝本月九日在紅磡海底隧道遇上交通意外，並涉嫌酒後駕駛和毆打傷人，事後被帶返警署。他日前返回警署報到，獲准以五千元延長擔保期，並於明年一月七日再返警署報到。
自此事後梁家輝一直深居簡出，昨日他在尖沙嘴宣傳有份主演的新片《雙瞳》，首次現身面對傳媒，梁家輝說：「呢次係我入行咁多年，最擔心見傳媒嘅一次，噚晚（即前晚）自己諗記者見到我會問我乜嘢問題，因為單官司重搞緊，我係唔可以講嘢。所以，今日（即昨日）我準備咗六個字『經一事，長一智』，呢件事我後悔好衝動，車禍係意料之外，其實眾多男演員，我最坦蕩蕩，狗仔隊平時跟我，最多咪跟到我𢱑屎忽同撩鼻屎。」
梁家輝表示這次意外，傳媒一早定了他的罪，他說：「傳媒喺事發後就定咗我罪，我承認當日係超標，但唔係醉酒駕駛，我確實係飲咗酒揸車。」那麼他以後是否不會再酒後駕駛呢？梁家輝說：「我講呢個答案好似向法庭求情，但我好肯定講飲咗酒係唔好揸車。」
此外，梁家輝昨日宣傳新片時，更手抱一個駁有長長臍帶的假嬰兒，十分恐怖，而對於早前有消息指他接拍此片後性情大變，梁家輝說：「我拍呢套戲嗰陣，因為好少講嘢，大家以為我有問題，直至回港初期，我都好少講嘢，不過事後都抽離得到。」