【本報訊】賭波規範化，政府以為莊家必勝，估計每年盈利可達三十億元。不過香港賽馬會主席夏佳理明言，他們並非場場都「贏梗」，馬會需要以封盤等方法減低風險。民政事務局局長何志平承認部份賭注會因此流向外圍，但相信警方有能力予以打擊。
夏佳理昨日出席商台節目《風波裡的茶杯》時表示，經營賭波存在一定風險，馬會未必賭得贏普羅球迷，不過他指出，馬會有很多方式分散風險，包括封盤及修訂賠率，只要管理妥善，一、兩場波蝕錢不是問題：「好話唔好聽，一場波輸五千萬，只要你長賭，同埋管理風險方面係得嘅呢，風險一定減到最低。」
馬會會透過高科技隨時調整賠率，並會以封盤及套戥方式，減低莊家輸錢風險。何志平出席公開場合時也承認，若將來馬會透過封盤減低風險，將難以避免賭注流向外圍：「但係我哋最終目的係打擊大部份非法組織，剩番落嚟嗰啲，警方係會有足夠警力，同好有效咁去禁制。」
有電台聽眾則指出，即使馬會可以套戥分散賭注，風險仍然存在：「我哋都曾經見過有外國賭波公司俾人煲爆執笠，有朝一日，你哋射咗去外國賭波公司，萬一咁不幸佢哋煲爆咗冇得畀。」
今年世界盃期間，康樂及文化事務署曾租用政府大球場直播部份球賽，夏佳理說，賭波合法化之後，馬場也有可能直播一些重要賽事，例如英超聯季尾的冠軍爭霸戰，但要考慮對鄰近居民影響。
夏佳理是天主教徒，他強調馬會並不鼓勵人賭博：「好似吸煙同飲酒咁，好多人都覺得係道德問題，最緊要你唔好影響到自己同家人……唔係推動賭波，只係有個檔口喺度，如果人哋想投注嘅就可以嚟，我哋唔會四圍喺街搶客。」