美股周三大升，真係連美股都幫埋好友，港股噚日期指結算，恒指單日勁升203點，收報10147，成交增至73.17億元。全場最矚目係電盈（008），股價不但再升3.3%，成交重高達3.73億元，在成交榜中排第三，僅次於滙豐（005）及和黃（013）。
黑客四出打聽電盈近期出現不尋常異動原因，但冇乜頭緒，最新消息係電盈最近與中國電信（728）行得好埋，如果大家唔善忘嘅話，應該記得早前市場曾憂慮大東手上約14%電盈如何處置，導致電盈股價下滑時，即刻傳出中國電信可能出手相助，有意持有電盈約10%股權，但傳聞最後不獲得證實，之後不了了之。不過，中港兩大固網商要發展更加緊密關係，並非奇事，只是電盈近期反彈得太急，高追就要諗吓先。
噚日有中型基金力掃國內汽車股，其中股權收歸國有嘅華晨汽車（1114）勁升6.5%，收報1.30元，成交達7488萬元；駿威（203）亦急升4.8%，收報2.725元，成交6852萬元。Cookie話，駿威似乎正在重整升勢，想突破3元，而華晨控股權搞掂後，業務將重回正軌，股價有力挑戰1.50元。國內汽車銷售持續高速增長，今次買家亦相當有實力。
中國特種纖維（285）周二遭斬倉，大跌逾9成後至今都未能復牌。據聞，此股在停牌前，曾有證券行以當時市價折讓20%批售，當時唔少炒家都有接貨，但之後突然搞到插水9成兼要停牌，唔少炒家都十分氣頂，大鬧某某證券行大整蠱。講真，凡二三線股出現場外大折讓價批售，通常唔慌係好嘢，千祈咪亂接，否則會遭殃。呢類股份在交易所成交一般唔會多，一旦跌起上嚟，輕則3至4成，重則跌足八九成，同時好難搵人接貨。
阿虎