每逢年尾，外國好多歌手組合都會出DVD賺fans一筆，我大口羅拉最近就買咗英國虛擬樂隊Gorillaz嘅DVD，真係正到飛起！
由英國樂隊Blur主音DamonAlbarn同幾個音樂人一手一腳搞出嚟嘅Gorillaz，全新DVD用咗特別嘅硬紙boxset包裝，入面除咗有DVD睇之外，又有卡通隊員貼紙同埋勁厚畫冊，兼且重有一隻放入電腦有game玩同可以下載screensaver嘅CDRom，夾埋都係一百七十蚊，抵玩過Morning娘嗰啲乜乜掠水boxset好多。呢隻DVD嘅戲肉，當然係Gorillaz嘅MV同演唱會片段啦，DVD菜單嘅編排直頭好似帶大家入Gorillaz屋企一樣！
除咗可以睇到拍攝技術高超嘅Gorillaz卡通MV之外，入面重有動畫製作嘅分鏡片段，連佢哋嘅演唱會都可以用多角度嚟睇！不過最過癮係由Gorillaz卡通成員演出嘅搞鬼短片，好似成員Noodle扮成《死亡遊戲》入面嘅李小龍，同大隻佬「開拖」，而主音2D就學人走去街頭靜坐！