今日人大預選，係港區人大選舉熱身賽，78位報名者中，有24位「冇得留低」。雖然五位民主派：何俊仁、單仲偕、涂謹申、馮檢基及張炳良入選機會唔高，但聽聞中聯辦為防萬一，已經開始出手，打電話畀愛國愛港人士。親中圈子流傳一句口號：「先保舊，後保友」，即係先支持尋求連任嘅31位人大，再投票畀友好，務求砌低民主派。
另外噚日「香港福建節」開幕，亦變成港區人大「拉票日」。八方見到成二十個候選人出現，好多同福建都冇乜關係，只係專登嚟最後衝刺拉吓票，當中以城市大學法學院副教授梁美芬最坦白：「唔好意思，唔得閒同你傾住，趕住拉票。」
講開福建節，福建省委書記宋德福好畀面，佢話上任兩年來第一次出境即刻嚟香港，顯示閩港關係幾咁密切，𠱁到董特首好開心。
大會重特登將香港飛龍標誌，同福建省飛鳳標誌並列，實行「龍鳳配」，不過呢條飛龍甩頭甩骨，同正版差好遠，唔知係咪宣傳「咪用翻版」行動呢？
傳真︰2623-9278
電郵︰