賭波規範化係近日最熱門嘅話題,噚日八方喺立法會,見到早排又俾狗仔隊影到同緋聞女友廖碧欣約會嘅李國寶議員,八方先將靚女擺埋一邊,同佢傾吓足球啦。
佢老兄話,自己都鍾意睇波,但係就唔賭,又大讚兩個仔估波好叻㖭。咁究竟兩位李公子又有冇賭吓波呢?估唔到寶哥哥鬼死咁大方承認:「佢哋都二十幾歲人喇,我諗有少少啩。」李公子賭幾大、點賭法,八方無從稽考,但係𠵱家賭波仍然未合法化,斷估兩位公子都只係賭餐飯,或者賭吓牙骱啫。
講番李國寶,佢老兄話重要詳細睇過賭波合法化方案之後,先決定支唔支持。其實,李國寶本身係港大副校監,又有一間以自己名字命名嘅學校(香港管理專業協會李國寶中學),假假哋都係半個教育界,所以佢嘅投票取向都幾惹人關注。
傳真︰2623-9278
電郵︰