新款MiniCooper，雖然要到今年2月起才開始交車，至今不足一年，但偶然經已有二手放盤，以自動波版本為例，現時二手叫價多介乎15萬至17萬元之間。
由於2002年嘅香港配額一年前經已賣清光，若要訂購新車的話，閒閒哋都要等半年以上；加上Mini屬潮流車款，退而求其次願意買二手現貨車嘅買家依然大不乏人。因而造就咗二手Mini嘅成交價，出現十分貼近新車價嘅罕見情況。新MiniCooper自動波型號最初賣$175,300，今年中才加價至$193,000，可算係近年極少數能夠逆市加價嘅車款。
站在用家立場嚟講，除非係非買不可，用極為接近新車嘅價錢，去購買一部二手車其實唔係好化算；一來要上會的話，落過地嘅車息口始終較貴，總供款額到頭來隨時同買部新車相差無幾；購買保險時，保單嘅優惠條款亦未必比代理指定嘅保險公司全面。另外，前車主如何用車、保養及有無發生過任何大小事故等等，點都存在有一定嘅風險因素。
不過，二手Mini折舊率奇低，並唔係香港獨有現象，喺英國亦有類似情況出現；但用家要注意嘅係，求過於供始終係目前影響二手價格嘅最大因素，再過一段日子，待供求平衡時，可能會有另一番局面。
新款MiniCooper最引人入勝之處，就係其內外設計，既Classic又有Taste，市面上好難有第二部車有得比；另外，買家又可以喺車頂款式、顏色配搭及胎軨組合等等作自由選擇，炮製出自己喜愛嘅式樣。
而喺揀二手放盤時，原廠維修紀錄務必齊備，同時要注意電器及任何警示燈嘅異常情況；至於原廠提供保用服務嘅屆滿日期，落訂前可先致電代理嘅維修部加以核實，咁就最穩陣喇！
資料提供：Auto22.com