陳曉東頻頻喺沙田同大埔嘅新樓盤出現，有代理話畀蘭西知，東東近排四出睇樓，有意入市。聽講佢已經先後睇過九肚山皓朗山莊、火炭半山伯爵堡、大埔滌濤山同淺月灣幾個豪宅新盤，budget係二千萬左右嘅獨立屋。
東東出道時住沙田世界花園，跟住搬咗去同區嘅樂山別墅獨立屋，不過係租嘅，唔續約就要搵地方搬。
咁啱呢排豪宅市道好番啲，於是出嚟睇吓樓，睇咗咁多間，暫時以皓朗山莊嗰間示範單位最啱心水，不過銀碼超出預算，惟有同發展商拉吓鋸，如果成事嘅話，東東繼續做沙田友。
皓朗山莊間示範單位睇落都幾受歡迎，蘭西記得早排有對買咗皓朗孖屋嘅新加坡籍兄妹，亦係睇完示範單位後諗住換屋，重話同發展商傾緊，𠵱家出現勁敵，唔知花落誰家。
永泰亞洲小欖漣山昨日頒咗個累積銷售大獎畀美聯，獎品係水晶獎杯同一支82年法國波爾多紅酒。雖然獎品都唔差，但佣金最實際。美聯講，佢哋佔銷售比例逾四成，佣金高達八百萬元。
其實漣山月初開放現樓後，就以高佣高獎金策略促銷，每售出一個單位，代理有樓價2%佣金，經手嘅經紀收樓價0.5%作為獎金。
由於現樓貨尾以大單位及複式為主，樓價至少三百萬，一單生意代理行收成六萬蚊佣，經紀就收萬五蚊獎金，難怪咁落力啦！
係噚日搞完漣山之後，永泰亞洲就神神秘秘咁派發錄音帶，盒面印住「漾日居任務情報」，盒帶雖然六十分鐘，但實際只有一分鐘有人聲，內容係宣布今日漾日居活動嘅時間同地點。
𠵱家發展商或者代理賣樓，經常會加插餘興節目畀傳媒欣賞，大部份都好有心思，彈琴跳舞耍雜技，蘭西都睇過唔少，但係噚日嘅瑜伽表演就真係第一次。第一太平介紹麗新林伯私人持有嘅飛鵝山溫莎堡，請咗兩位瑜伽高手表現，寓意係做瑜伽需要寧靜嘅環境，而飛鵝山就最啱嘞。
兩位高手係明星黃佩霞辦嘅瑜伽學校嘅學生，現場做出連串高難度動作嗰個係加拿大人，研習瑜伽超過六年，佢話咁多人圍觀下做瑜伽都係第一次。12月15日之前睇樓人士可獲贈瑜伽練習班贈券。
代理為新盤誓師，成為賣樓嘅例牌節目，幾百人坐埋一齊嗌口號，場面墟冚。平時甚少接觸代理嘅香港興業陳子明，噚日喺美聯搞嘅東涌藍天海岸誓師會，就畀佢哋嘅陣容嚇親。佢話第一次參加呢類集會，覺得好震撼，不過嚟緊重有大把誓師會，去得多就慣。
政府救市九招包括放寬三成內購限制，到𠵱家都重未知已經批咗售樓紙嘅新盤係咪適用，興業已經搵咗律師去信問政府，不過政府重未有回覆，惟有一邊等一邊部署，見步行步。
近年經濟唔好，商場大業主要度啲與別不同嘅橋，先至吸引到消費者。和黃紅磡黃埔新天地，聖誕黃金檔期以「黃埔新天地之魔幻動感（激光）聖誕嘉年華」作招徠，實行中西合璧，上演一齣聖誕老人東海龍王水晶宮奇遇記，包括有東海龍王、蝦兵蟹將、烏龜丞相等中國神話人物。
至於嘉年華嘅高潮，係戶外雷射激光表演，黃埔號船身會變成一個成千方呎嘅屏幕，播放幾千幅由電腦動畫繪製嘅插圖，造成好似一齣卡通片嘅效果。
激光表演時間係12月22，24至26號晚上六點半到七點。
蘭西
電郵地址：