張栢芝前日高調展示和陳小春同款的伯爵情侶鑽表，兩人更不約而同以名表配襯鑽戒及耳環。小春昨日就此事打趣說：「佢戴伯爵、我就係伯削；佢隻係真鑽、我係假鑽；佢係A貨，我係B、C、D貨，點同呢？」
近日張栢芝翻𠝹陳小春的緋聞甚囂塵上，她前日在北京出席電影宣傳時，高調展示她的伯爵鑽表、兩隻鑽戒和鑽石耳環。而早前陳小春出席《萬眾同心公益金》節目時，和栢芝前天的行頭極相似，同樣是以伯爵鑽表配鑽戒和耳環，看來栢芝和小春的緋聞並非空穴來風。
小春昨日在尖東日航酒店舉行的《禁毒滅罪耀北區》記者會上，提到和栢芝戴情侶表時說：「佢戴嗰隻係伯爵，我就係伯削；佢隻係真鑽、我係假鑽；佢係A貨，我就係B、C、D貨，點同呢？」記者指兩人經常着hiphop情侶裝，小春說：「邊會一樣呢，佢係女仔，我係男仔。」
對於有報道指栢芝在北京時藐記者，小春力撐栢芝說：「以前我都藐啦，不過𠵱家冇咁執着，同傳媒關係又好咗，件事唔係咁嚴重，可能北京凍先會咁啫！記者會喺室內可能一冷一熱，所以先會藐吓藐吓。」記者指小春幫栢芝，他說：「我哋同一間公司，冇理由詆毀人嘅！總之做我嘅朋友就冇蝕底，做我嘅仇人嘅，我睥都睥爆佢呀！」
此外昨日出席的歌星包括有李克勤、余文樂和麥浚龍等，而十二月八日舉行《禁》演唱會時，出席的歌星除以上人選外，還有譚詠麟、張學友、陳慧琳、許志安、楊千嬅及梁詠琪等，惟獨是英皇的歌手，一位都沒有，而早前在台灣接受勒戒的蘇永康亦沒份。
記者就此向北區撲滅罪行委員會主席葉方強查詢，他表示歌手是由無綫方面邀請，委員會並沒有參加意見，而無綫方面亦是上周才交出歌星名單，所以印製海報亦非常匆忙。而監製錢國偉則表示，無綫每間唱片公司都有邀請，可能英皇方面因為忙於《英皇三周年慈善演唱會》，所以歌手無暇出席。
採訪：卓美娟、楊潔雯
攝影：仇志德