陳奕迅（Eason）日前拍攝新歌MV扮鬼，攬着性感大馬靚女一同拍淋浴戲，淋足六小時。Eason自言拍MV多年，首次有如此豔福，故要多謝導演安排。
陳奕迅早前在西貢一間豪宅拍攝新歌《LonelyChristmas》MV時，豔福無邊，抱着穿上tubetop的大馬靚女一同拍濕身淋浴戲，連Eason都自言與女主角這麼親熱拍MV是第一次，故要好好多謝導演。
由於該MV講述Eason與女友拍拖多年，但他意外身亡，女友仍未能忘情，朋友們因此開聖誕派對為她解悶。但其女友不時惦記着Eason，覺得他無時無刻不在身邊，而Eason亦甚掛念女友，遂化成鬼魂接近她。
其中一幕講Eason女友沖涼，因思念而痛哭，Eason便從後熊抱女友，二人一同淋浴。
雖然可親近靚女，但Eason拍淋浴戲也相當辛苦，因為他是鬼魂，故要穿上大毛衣拍攝，他足足淋了近六小時，始拍畢該場戲。Eason說：「件冷衫濕晒，黐住個身真係幾唔好受，當日天氣又凍，唔係齋享豔福㗎，都要付出㗎。」
扮演Eason女友的馬來西亞模特兒，身穿黑色tubetop，身材不俗，Eason也覺得自己享盡豔福，他笑說：「我拍咁多MV都未試過攬住咁靚嘅女主角，以前同超儀嘅，就唔算啦。佢係兄弟嘛，今次導演咁益我，都唔知點多謝佢好，惟有攬實啲當報答導演大恩大德囉。」
問Eason聖誕節在MV中扮鬼魂會否不吉利？他說：「百無禁忌，西洋節唔介意呢啲嘢，我哋最主要係做個浪漫氣氛啫。」