行政人員從來都講究stressmanagement，所謂stress，未必全是工作壓力，總之就係精神緊張，令到心情唔好，脾氣變壞，有時容易鬧人，有時唔敢出聲，甚至乎食慾不振，晚上失眠，或者皮膚痕癢，對蝦蟹貝殼類食物敏感。
乜嘢事令人最覺得stressfeel呢？財務L間公司最近搵咗一位心理輔導專家，向幾十位財務、會計、管理部嘅文職人員講解紓解壓力之道，講課前，導師發一張問卷，請啲職員在下列幾件事之中，揀一件最令佢哋覺得緊張（stress）嘅事。事例如下：配偶死亡、父母死亡、子女發生意外、炒魷、工作時間長、工作量過大、自覺知識不足、無法與別人溝通、子女學業、健康不良等等。結果呢，大部份職員都選咗「炒魷」為最令佢哋覺得stressfeel嘅事。
財務L睇到結果，與心理輔導師商量，導師說：「根據外國同類調查，職員覺得最緊張之事就係至親死亡，尤其是係配偶，但今時今日，你嘅職員最怕嘅就係炒魷，所以你同佢哋溝通之時，最好少提裁員、重組、精簡呢啲字眼。」
財務L為之嘆一口氣，呢啲字眼，今時今日，點會唔時時掛喺口唇邊吖，但一講，下屬就心驚膽跳，恐怕裁員，跟住就憂供樓、供子女讀書。如何解放呀？請心理學家開班，都怕係聊盡人事啫。