二人組合Twins噚日一早去咗上水香港賽馬會騎術學校，出席「展能天使」活動，佢哋即場學洗馬鞍同餵馬食嘢。佢哋兩個見到啲馬好開心，喺馬房入面重成日用手摸隻馬。
不過蔡卓妍（阿Sa）同鍾欣桐（阿嬌）就遇正隻好「現實」嘅馬，因為阿Sa成日餵嘢畀隻馬食，所以隻馬一見佢就好熱情咁行埋佢身邊；而阿嬌可能餵得少啲嘅關係，當阿嬌一摸佢時，隻馬就即刻擰歪面。
其實Twins唔係第一次接觸馬匹，佢哋對馬都好有興趣，不斷向工作人員發問問題，問到啲工作人員口啞啞，當工作人員講起啲馬可以食紅蘿蔔，阿Sa即刻問：「阿媽話食蘿蔔會破氣喎﹗」而阿嬌知道啲馬會食糖，就好奇咁問：「咁佢哋飲唔飲汽水㗎？」
此外，Twins嘅新曲加精選唱片《HappyTogether》喺今日發售，但唱片定單已經接近雙白金，佢哋噚日不時賣花讚花香話：「我哋喺唱片入面總共有十個造型，好性感㗎。」
楊思琦噚日喺駕駛學院學揸輕型貨車，佢雖然生得嬌小玲瓏，但揸起上嚟都有板有眼，之前思琦俾人影到佢坐李泳豪架順風車，不過思琦話考車牌純粹係方便自己。而噚日思琦就戴埋頸箍學車，佢話要固定條頸，因為怕頸患復發而搞到頭暈作嘔。
蔡少芬（Ada）同歐陽震華（Bobby）噚日為無綫新劇《陀槍師姐IV》喺土瓜灣一間車行開工，Ada喺戲入面要揸部價值二萬八蚊嘅新綿羊仔，Ada啱啱學緊電單車，但都要搵替身幫手，佢話：「基本動作其實學晒，不過揸車鏡頭要搵替身做，自己做番啲上落車動作。」
每年尾各電台都為籌備樂壇頒獎禮而忙碌，港台今屆頒獎禮適逢第二十五周年，所以港台特別以「金曲25年，重溫經典難忘片段」作為口號，重特登設計咗個logo嚟宣傳《十大中文金曲頒獎禮》。不過有人就話呢個新logo係抄外國艾美獎嘅logo，佢哋同樣係四格標誌，分別就只係港台個音樂符號logo放喺第三格，艾美獎嘅公仔就放喺第一格，其他就無論顏色同感覺都有八成似。