「黑俠」沙華上星期先至成為富咸擊敗利物浦嘅贏波英雄，但係佢喺周二歐洲足協盃對柏林哈化就做咗狗熊，佢擺烏龍射入自己龍門成為輸波罪人，領隊泰簡拿賽後重炮轟佢累球隊無得贏波，簡直就係被人由天堂打入地獄一樣，認真冇癮。
無錯，沙華個烏龍波的確直接令球隊輸波，但係我大俠睇番呢個入球，佢都係背住龍門被對手壓住情況下，先至將對方開出嘅罰球錯腳「撻Q」撞咗個波入網，都唔算不可原諒嘅大錯。之不過，泰簡拿賽後勁鬧沙華之餘，重話第一個失球都係佢無盯實邊列治所致，將輸波責任推晒落去。其實，球員總有犯錯，輸波唔可以話晒一個人，況且𠵱家重有一個作客入球優惠在手，下次返主場重有得追，泰簡拿唔使咁躁啩！
唔知係咪因為歐冠盃出局，搞到拜仁班球員鬼火咁躁，繼之前發生李沙拉素同尼高高華打交後，據報話日前輪到古科同謝利美斯響練習時講手。最後古科被罰一萬歐元。古科重好似死不悔改，好寸咁同球會代表講：「收唔收VISA呀？」我認為拜仁教練希斯菲特真係要認真整頓一吓球員嘅紀律問題。
國內消息透露，聽講愛華頓已經決定買斷李鐵，轉會費唔會少過一百五十萬鎊，再加埋李兄弟啱啱入選上個禮拜英超最佳陣容，真係喜事接踵而來。另一位李兄李瑋峰就坎坷得多，唔單止隨時被送返，近日響練習賽又踢得曳，重受傷搞到成個鼻都係血㖭。兩位李兄當日行埋同一條路，估唔到𠵱家就各走極端……。
湖人球星奧尼爾喺噚日場波打到失魂落魄，佢自己評分都話只得C級；望向觀眾席原來發現網壇靚女古妮高娃在座，記得奧尼爾曾經喺自傳剖白話自己好愛慕呢位俄羅斯美人，唔知呢位巨人係咪畀古妮高娃嘅豔光閃到三魂唔見七魄，所以打到失晒水準累湖人爆大冷輸畀弱隊熱火。
拓荒者（TrailBlazers）以後可以改名做監躉隊（JailBlazers），佢啲球員唔知係唔係特別有犯罪傾向，繼史杜達米亞同華萊士被警方發現藏有大麻，搞到要公開道歉，但冇耐隊中另一球員柏達臣噚日又因毆妻被警方拘捕，加埋隊波其他球員之前犯下嘅蘇州屎，拓荒者班球員幾乎可以組成一支監躉明星隊。
逢周一至周五見報