小初都話咗中國特種纖維（285）玩完笨豬跳後，二三線股仔會好難玩，噚日股價上升嘅股仔，好多都冇成交，連帶近排強勢嘅廣興國際（1131），噚日復牌走勢似足過山車，短期內股仔都幾難搵人玩。
小初與經紀黃研究一輪後，將目標放在基金股及有機會成為基金股嘅股份，好似前日提過嘅華晨中國（1114），噚日又升2.5%，收1.22元。
經紀黃話，臨近年底，班芬佬為咗櫥窗粉飾，點都會頂住股價，唔會太難睇。
另外，佢又向小初推介哈爾濱啤酒（249），雖然話就話大麥價格上升影響成本，但話晒哈啤在大陸有一定名氣，而且隻股上市以來，貨源一向歸邊，股價最低1.34元，最高2.25元，家陣仍然企在2元樓上，一睇就知道係乜嘢事。
近排哈啤高層頻頻與外資證券行分析員會面，據聞評價唔係太差，唱好報告會陸續出籠，所以不妨留意走勢，短炒一轉。
慕容小初