香港人北上消費，一定離不開食。不過甚少香港人會選擇到酒店用膳，認為消費昂貴而食物又毫無特色。上星期我就去了深圳一間四星級酒店，食了一頓?99的自助晚餐，除咗有我最鍾意食的三文魚和生蠔外，還有多款日式鐵板燒供應。不過最令我驚喜的，是竟然有一人一爐火鍋，喺咁優美嘅環境下打邊爐都係第一次。
記者：張杰
攝影：高喬
甫入到酒店的二樓餐廳，舉目所見幾乎每張枱都有一個火鍋，就知道今餐一定少不了火鍋的份兒。逛了一個圈，發覺火鍋配料差不多有成五十款之多，而必食的首選是海鮮，主打有東星斑魚片、切邊龍蝦仔、肉蟹、象拔蚌仔、海參等多款回本海鮮。其他如鮮黑牛肚、鷄子、龍蝦丸、肥牛、生魚片等港人喜愛的火鍋配料亦一應俱全。湯底更有清湯、沙嗲和辣椒湯底三種任擇。
喺香港，某連鎖快餐店推出的星斑打邊爐，每位差唔多都要$50，喺街市買都要百幾蚊一條，要回本當然要揀東星斑啦！何況好少地方打邊爐會有東星斑魚片作為配料，而且每條都係即劏，所以保證新鮮。
喺咁多款火鍋配料中，見到呢碟牛蛙，即刻試試，因為喺香港唔會食得到。食落口又滑又鮮甜，而且比田鷄大隻，口感更佳。
問侍應最受歡迎的食物，她立時推介龍蝦仔，「咁多款食物中，以龍蝦仔去得最快，廚房單係將龍蝦開邊，已經弄到停不了手。」
歎咗一陣火鍋，開始去搵其他食物，行到生熟海鮮區，嘩！差不多有近二十款可供選擇，當中白灼海鮮就有蝦、蟹、生蠔、青口及瀨尿蝦等基本選擇。其中我最欣賞瀨尿蝦，蝦身肥美又鮮甜，啖啖肉相當有口感；而白灼蝦的水準就有點令我大失所望，略嫌唔夠鮮甜大隻。
鐵板燒也是這裏的一大特色，因為喺深圳，即使是五星級酒店的自助餐，也鮮有鐵板燒專區，而秋刀魚和多春魚都深受歡迎，其他食品還有肥牛、羊肉、鰻魚及元貝等十多種選擇。
聽酒店經理講，刺身中以三文魚最受歡迎，而且是即場切片上碟，雖然每碟細細份，但食完可以再攞，次數不限。
（一）盡早入場：
自助餐時間由六點到九點，比香港提早約一個鐘，而且內地人吃晚飯的時間較早，不少人六點前已到場，想座位靠近食物，最好早到場或預先訂位。
（二）持酒店貴賓卡有八折：
在酒店服務台和西餐廳都有出售，每張?50，本人食自助餐即時有八折優惠，下次同行朋友亦可享八折。該卡優惠期到明年12月31日。
深圳萬德諾富特酒店
地址：深圳市深南中路（水務集團）萬德大厦萬德諾富特酒店二樓
訂座電話：（755）82137999轉8220
自助晚餐時間：6:00pm-9:00pm
價錢：成人?99；小童?48，接受各種信用卡。
＊由羅湖關口乘的士約?20