由於工作關係，麗姐只會在星期六、日下廚，其餘時間則交由菲傭代勞，不過她會教菲傭到自己買慣買熟的檔口買餸，除因食物質素較好外，亦不怕菲傭被呃秤。屋企附近有兩個街市，分別為柴灣市政大廈內的新街市及漁灣街市，而為了買靚餸，麗姐兩個都會去。
每次買鯪魚肉，麗姐都會走到柴灣新街市低層的寶仁魚檔，因為這裏的鯪魚肉已經醃好，而且非常入味，回家可立即煮來吃，不用再加其他調味品。
她又走到魚檔附近的源興肉檔買豬𦟌煲湯，麗姐話由於買慣買熟，每次煲湯，豬肉檔龐哥都會留起一些靚豬𦟌給她，就算菲傭來買都一樣買到。龐哥還告訴我們，這陣子的黑草羊最靚，買來煮羊肉煲最暖胃，趁本星期冷鋒到買來吃最合時。黑草羊每斤售24元。
從柴灣街市買完鯪魚肉及豬𦟌後，麗姐又帶我們走到另一邊漁灣街市買菇，她說情願多走一步也要過來森記買菇，因為森嫂賣的菇類質素高，她更會細心教導你怎樣揀靚菇以及回家後的儲存方法。除此以外，森嫂更花了萬多元在檔後造了一個雪櫃，保持菇類新鮮。問森嫂揀菇秘訣，原來要揀「實淨」才叫靚！