美國女歌手ChristinaAguilera近排嘅形象真係愈嚟愈激，啲衫亦愈着愈少，佢咁做當然係為咗宣傳隻新碟《Stripped》啦，Christina重唔只一次咁話自己唔會扮乖女，鍾意着成點都得，要畀大家睇吓佢嘅真性情喎。
姑勿論Christina呢番話係有心定無意，但係我羅拉最近八到料，話美國著名成人雜誌《花花公子》已經睇中呢位性感女歌手，想搵佢做雜誌嘅封面女郎，𠵱家雙方喺度傾緊啲合作詳情。
我諗大家都知《花花公子》期期嘅封面女郎都會露吓點，所以各位應該會好好奇究竟Christina會唔會為本書拍裸照呢？據我羅拉估計，Christina近期嘅形象咁出位，而且佢又講到明唔會做純情玉女，所以如果拍得成嘅話，佢喺《花花公子》入面大有可能會放棄最後一道防線，以最激嘅造型示人。
講真，Christina已經露慣露熟，喺佢首歌《Dirrty》嘅MV入面，經已極盡性感之能事，再加上佢早排出席公開場合，以及幫兩本音樂雜誌《Blender》同《RollingStone》拍封面照嗰陣已經露到無可再露，相信今次佢幫《花花公子》影封面，應該都會好似佢隻歌名一樣咁dirty，搞到我羅拉都好想睇！