呢排房屋及規劃地政局常任秘書長CM梁展文為咗推行局署合併，同埋精簡房署架構，不斷同啲房署員工「火星撞地球」；啱啱先至出公開信向房署萬多名員工澄清冇抹黑長俸制員工，噚日CM又差啲再得罪班員工。
話說CM出席職業訓練局同八大房地產專業團體舉辦嘅房屋策略午餐演講會，主辦人之一房地產服務業訓練委員會主席袁靖罡介紹CM出場時多口咁話：「頭先食晏時傾偈，房屋署係大部門，我話係大笨象，梁秘書長就話唔止係大笨象，係大恐龍至啱。」八方聽到都戥CM揑一把汗。CM即刻補鑊話係純屬笑話，佢強調對房署員工好有信心，員工亦好有效率。袁靖罡噚晚就匆匆忙忙發聲明向CM「鄭重道歉」，佢話相識多年，呢類笑談份屬平常喎！
傳真︰2623-9278
電郵︰