提起玩具不但小朋友雀躍，就連大細路也歡天喜地，因為今次的玩具均以特價發售，平之餘選擇又多，高達模型、機械人、鐵甲人、Licca、$50一個Jenny，還有韓國懶貓及叮噹精品等，別說買來收藏，就算買定當聖誕禮物送畀大小朋友，都夠體面兼有着數。各位有心人，要買趁手喇。
記者：楊一凡 攝影：陳陶鈞
女賓部
跟Barbie一樣是美國製造的Jenny，在香港的Fans人數遠超Barbie，點解？據Jenny迷說：「珍妮身形接近東方人，五官精緻而且小腿無咁粗。」如今有十款Jenny公仔以半價五十蚊出售，幾有吸引力，款式方面有宮廷裝、公主裝、婚紗款、校服百褶裙、校褸直身裙、滑板女、睡衣美人及Band女等。
十款手工精細的Jenny衫仔，得意在隨靚衫跟埋小帽、短靴、絲襪或手袋等，成套襯晒色系及花款，對衣服搭配的要求認真過你同我。衫仔靚款有珠片登台閃褸、毛毛系列、百褶裙、晚裝、民族圖案裙及睡衣等。值得一提是Jenny衫仔大頭妹一樣啱着。
Jenny是本地台柱，而Licca是威震全日本至受歡迎的人形公仔，今次特賣的三款公仔玩三十年代的時裝，有閃到痹的銀線晚裝、深色斑點紋的大毛衣及雪白長身裙，那份隆重的懷舊感覺，令人聯想到徐小鳳。
男賓部
六十年代風靡一時的鐵甲人GiantRobo曾推出特攝科幻片，事隔多年，今次為何榜上有名？一來潮流興懷舊，二來它斤両十足，每個重2.5kg，今次有幸入特價行列的鐵甲人有兩款，分別在武器，即大碌炮或全身導彈炮，但兩款鐵甲人都有紅顏知己銀鈴相伴。
去年在日本播影的卡通片《電腦冒險記》，其主角古拉迪安最愛走入網絡世界打交。這盒主角機械人內置遊戲，接駁電視機後可當Joystick用，扭成火車就玩火車Game，扭成機械人就打機械人Game；古拉迪安是主體，你可另買其他配件，如電劍等，每盒都係幾十蚊左右。
同場加映
叮卡Dinga韓國大頭貓是2001年南北韓第一次跨越國界合作的電腦動畫影集。主角Dinga不似前輩賤兔那樣愛玩把戲，Dinga憑着溫和個性及加菲貓的渴睡眼神，逗得韓國人相當歡喜。
KantoHobby玩具特賣
地址：
銅鑼灣駱克道519號一樓(28383539)
旺角信和中心12樓1204室(27710100)
備註：銅鑼灣店設有男女賓部，旺角店只設男賓部。
開倉日期及時間：即日起，下午1時至晚上11時，貨品售完即止。