港股第2日下跌，啱數，再跌多一陣，然後又升過，年底高收。新世界發展（017）上禮拜最高4.875元，昨日最低4.55元，收4.575元，跌7.5仙，見底格。
新世界見底，要諗吓新世界Call輪短炒，9166成交太疏，唔使理，要揀9474，昨收24.2仙，跌9%。隻輪近期轉熱，昨日有23球易手，成交金額打入第17位，入於熱門貨嗰類。隻輪槓桿率去到18.9倍，雖然溢價20.7%唔低，但明年5月至夠鐘，溢價唔使太計較，炒9474係炒槓桿率多過炒溢價。新世界落後大市與同類股太多，遲吓爭氣踢番高啲，揸9474睇34仙。
電訊股升多過跌，聯通（762）升10仙，收6元，成交由13.8球大增至31球，買意盛；電盈（008）又升7仙，收1.50元，早段耐唔中清板掃上，擺明做嘢。中電信（728）企定喺1.44元，惟獨中移動（941）又跌15仙，收20.65元。
聯通及電盈等有勢，冇理由中移動獨憔悴，遲早跟番大隊上番去，大市始終輪流發展，冇理由升1隻唔升1隻。中移動Call輪又要昅實，熱門對象例牌係9532同9526。
華創（291）逆市升1格，收7.35元，成交再縮，沽壓已減，睇耐少少，可見8元，華創Call輪9270有機會見番20仙。
章盛