以少少錢就想同時間試多幾款菜式係香港人特性，$148有八道高質素西菜，集聯合國美食，包括有特色美國珍寶蠔、巴西式釀蟹蓋、法國鵝肝、新西蘭黃麖柳、日本神戶牛柳沙律等等，即刻請來小情侶Beatrice及Tony率先試試新鮮滾熱辣登場的森巴新菜。
記者：陳冰麗 攝影：陳穎
森巴還沒有轉營做Fusion菜前，原來是一間巴西燒烤餐廳，老闆康生稱：
「我喺巴西住咗個零月，見到當地嘅燒烤大受歡迎，於是返香港後就決定自己搞間巴西燒烤餐廳。四年前森巴正式開張，經營最初都頗理想，但慢慢發覺嚟幫襯嘅只係年輕人，加上地方細，唔可以坐太多人，每晚只能維到本」。
頭盤
這裏的頭盤超過十款，以每位$148價錢可選擇其中五款，其餘則包括湯、大盤及甜品。
蠔身八吋長，先食一隻已有少少飽肚感覺。炮製過程中阿強會將蠔肉起出，沾以適量麵粉略煎香再焗，令蠔肉外帶脆口但內裏則腍滑多汁。
大盤
大盤亦有八款，除以下介紹的兩款外，還包括有羊柳、乳豬排骨、龍蝦仔、肉眼扒、銀鱈魚等。
改良自巴西食法的燴海虎大蝦，保留咖喱調味，加多了椰汁一齊燴焗，食落微微帶辣，而南瓜的甜味亦可帶出蝦的鮮味；經略煎過的鵝肝，外脆內軟，入口即溶，配以秘製的酸甜汁食，是我的心水選擇。
甜品
首創新食法，中西混合，於傳統薑汁撞奶內加多了椰汁，凝固後再淋上以鮮果打成的茸拌食，味道清新，鍾意芒果味或士多啤梨味任君選擇。
免費
這裏的焗火燄雪山蛋糕較為與別不同，雪糕的比例多於蛋白的份量，亦因為蛋白較少之故，做的時間縮短，毋須久等，同時亦方便於蛋糕面寫上祝福句語。凡惠顧滿$300，均可獲贈一個。康生話會視乎人數多少而決定蛋糕的大細，所以人多的話亦毋須擔心份量不足。
康生續說：「年零後發覺形勢唔啱，需要轉營，思前想後決定嚟個大變身，半年前推出Fusion菜，𠵱家嘅食客不單止有年輕一輩，一家大細都有。呢度以熟客仔居多，全靠佢哋食過再介紹畀朋友嚟食，換嚟嘅反應都好理想，遠至屯門、元朗亦有食客食過再嚟幫襯。」
森巴行政總廚阿強，入廚九年多，擅於烹煮西餐，曾於馬會、OrangeTree等餐廳做過，加入森巴約半年左右。他醉心創作菜式，直認：
「森巴老闆畀到我好大嘅自由度，令我可以花多啲時間去創作菜式，我嘅創作靈感有部份係參考外國飲食雜誌，融會貫通後再加自己嘅創作，𠵱家大部份菜式已經成為森巴嘅招牌菜。」
小記亦試過其中菜式，最為欣賞嘅係特色煎美國珍寶蠔做法，尤其是個秘製醬汁，甜甜的很惹味，與蠔非常合拍，難怪老闆康生稱試過有食客揀五個頭盤都全部order美國珍寶蠔。康生認為餐廳幸好能保持食物質素才能留住一班穩定的熟客仔，而每隔一個月，餐廳即會轉換菜牌一次，務求令客人除可以好似在大酒店用餐一樣外，不斷會有新鮮感。
森巴
電話：25212166
地址：香港中區半山些利街17號A地下
價錢：每位$148（包括5頭盤+湯+大盤+甜品）、每位$138（包括2頭盤+湯+2大盤+甜品）。