星期六講電盈附屬公司Cascade，原來已經俾人截糊，大班C笑左丁山後知後覺，後人一步。冇法啦，寫專欄唔係今日寫，聽日登，中間有時差，落後在所難免。講開Cascade，我的偶像曹仁超喺「投資者日記」（十一月二十日）話：「屠夫搵咗四個顧問（乾收銀）都唔知要畀幾多銀，不如慳番啲錢做更實際啲事好過。𠵱家電盈好似變番做鬼佬公司咁，要靠睇外電同外國電視台始知佢最新動向……」
大編輯就有不同意見，佢對左丁山講：「電盈有幾位高層外籍人士負責傳媒關係，可能成日對住鬼子佬記者放風，好彩我哋亦有線路，否則就輸晒咯。至於賣廣告喎，最好電盈使多啲錢㖭，否則報紙老闆重嗌救命。
其實我話電盈嘅廣告重未夠多夠勁，否則朱總理對中資機構訓話就唔會出現下列句子：「李澤楷的那個公司叫做甚麼來着？（有人回答說：盈科）盈科電訊、電訊盈科……」朱總理係讚電盈識做，中電信宣布加價後，電盈冇加，但佢竟然講唔出個名，你話係唔係要多賣廣告。
曹仁超唔順超電盈啲鬼子佬只識外電外國電視台，有其道理，香港大公司做公關，最緊要係「通派」、「通有」，唔好淨係攬住一兩個相熟記者，但係如果個別記者特別勤力醒目，下下搶到好料咁都係公平競爭啫。