小初呢排見唔少股仔都有異動，好似炒家正在摩拳擦掌，準備大炒三四線股。但噚日突然見中國特種纖維（285）表演笨豬跳，股價單日急跌92.65%，收8.9仙，即刻淪為仙股，睇怕影響所及，今日細價股表現都唔慌會好。
小初曾經提過好多次中國特種纖維，講過佢股價似乎偏高，兼且時常有傳聞，話街外大戶想配股出貨。
𠵱家諗番轉頭，莫非係大戶水緊，所以急於求售。如果早排真係有投資者接咗貨嘅話，今次真係輸鋪勁。總之一句講晒，呢鋪真係累街坊。
不過，經紀黃仍向小初推介心水股，佢話夠膽就買華晨中國（1114），雖然華晨前主席跟遼寧省政府因股權問題搞到一鑊粥，但怪就怪在股價居然冇乜受影響，有大行分析員睇過間公司，發覺雖然股權糾紛持續，但公司則運作如常，因此部份外資行繼續推介華晨，所以短炒一轉亦可以。
慕容小初